సినీప్రపంచంలో విలక్షణ నటుడిగా పేరుగాంచిన ప్రకాశ్ రాజ్‌కు ప్రత్యేక పరిచయం అవసరం లేదు. బెంగళూరులో పుట్టిన ఆయన నటనపై చిన్ననాటి నుంచే ఆసక్తి పెంచుకున్నారు. కళాక్షేత్ర నాటక సంస్థలో రంగస్థల నాటకాల్లో భాగమవుతూ నటనా ప్రతిభను మెరుగుపరచుకున్నారు. అప్పట్లో నెల జీతం కేవలం ₹300 మాత్రమే. ఇదే సమయంలో ప్రముఖ దర్శకుడు బాలచందర్ తో ఏర్పడిన పరిచయం సినీరంగ ప్రవేశానికి మార్గం కల్పించింది.
1994లో డ్యూయెట్ సినిమా ద్వారా వెండితెరపై అరంగేట్రం చేసిన ప్రకాశ్ రాజ్, అదే పేరుతో ‘డ్యూయెట్ మూవీస్’ అనే నిర్మాణ సంస్థను స్థాపించారు. మణిరత్నం రూపొందించిన ఇరువర్ సినిమాతో మొదటి జాతీయ అవార్డును అందుకున్నారు. అనంతరం కాంచీవరం వంటి చిత్రాల ద్వారా ఉత్తమ నటుడిగా జాతీయ స్థాయిలో గుర్తింపు పొందారు. తమిళం, తెలుగు, కన్నడ, మలయాళం, హిందీ భాషల్లో వరుసగా సినిమాలు చేస్తూ ఇండియన్ సినిమా రంగంలో తనదైన స్థానం సాధించారు.
విలన్ పాత్రల్లోనే కాకుండా తండ్రి, తాతయ్య, మావయ్య పాత్రల్లోనూ ప్రేక్షకులను మెప్పించారు. హోస్ట్‌గా కూడా ఆయన పేరు నిలిపారు. ఆయనకు లగ్జరీ కార్లంటే ఎంతో ఇష్టం. బిఎండబ్ల్యూ 520D, మెర్సిడెస్ బెంజ్, ఆడి క్యూ3 వంటి కార్లు ఆయన కలెక్షన్‌లో ఉన్నాయి. ప్రస్తుతం ఆయన పారితోషికం ఒక్క సినిమాకు రూ.3 కోట్లు వరకు ఉండే అవకాశముంది.
వ్యక్తిగత జీవితానికి వస్తే, ప్రకాశ్ రాజ్ 1994లో లలిత కుమారిని వివాహం చేసుకోగా, 2009లో విడాకులు తీసుకున్నారు. అనంతరం 2010లో కోరియోగ్రాఫర్ పోనీ వర్మను రెండో వివాహంగా చేసుకున్నారు. ఆయనకు ముగ్గురు సంతానం ఉన్నప్పటికీ ఒక కుమారుడు చిన్న వయసులోనే మృతి చెందడం విషాదకరం. ప్రస్తుత నివేదికల ప్రకారం, ఆయన ఆస్తుల విలువ సుమారుగా ₹50 కోట్లుగా అంచనా వేయబడుతోంది.