ఐశ్వర్య రాజేష్ తెలుగు కుటుంబానికి చెందినప్పటికీ, తమిళ చిత్రసీమలో స్టార్ హీరోయిన్‌గా గుర్తింపు తెచ్చుకున్న ప్రతిభాశాలి. 1990 జనవరి 10న చెన్నైలో జన్మించిన ఆమె, ప్రముఖ నటుడు రాజేష్ కుమార్తె. కానీ, చిన్నతనంలోనే తండ్రిని కోల్పోయిన ఆమె, తల్లి నాగమణి (Classical Dancer) సంరక్షణలో పెరిగారు.
నలుగురు పిల్లల్లో చిన్నదైన ఐశ్వర్య, ఇద్దరు అన్నలను చిన్న వయస్సులోనే కోల్పోయారు. ఆమె తాత అమర్‌నాథ్ సినీ నటుడిగా, అత్త శ్రీలక్ష్మి (Comedy Actress) 500కి పైగా తెలుగు సినిమాల్లో నటించి ప్రఖ్యాతి గాంచారు. చెన్నైలోని ఇతిరాజ్ కాలేజ్ ఫర్ ఉమెన్ లో B.Com పూర్తి చేసిన ఐశ్వర్య, సినీరంగం వైపు అడుగులేశారు.
తొలుత తమిళ చిత్రాలతో గుర్తింపు తెచ్చుకున్న ఆమె, 2019లో ‘కౌసల్య కృష్ణమూర్తి’ చిత్రంతో తెలుగు ఇండస్ట్రీలో అడుగుపెట్టి బ్లాక్‌బస్టర్ విజయాన్ని అందుకున్నారు. ఆ తర్వాత ‘వరల్డ్ ఫేమస్ లవర్’, ‘రిపబ్లిక్’ చిత్రాల్లో నటించినప్పటికీ, ఆశించిన స్థాయిలో విజయం సాధించలేదు. అయితే, 2024 సంక్రాంతికి విడుదలైన ‘సంక్రాంతికి వస్తున్నాం’ చిత్రంతో మరో ఘన విజయాన్ని అందుకున్నారు.
ప్రస్తుతం ‘కరుప్పర్ నగరం’, ‘మోహన్ దాస్’, ‘తీయవర్ కులైగల్ నడుంగ’ వంటి తమిళ చిత్రాలతో పాటు, ‘ఉత్తరాఖండ’ అనే కన్నడ సినిమాలో నటిస్తున్నారు. ఆమె నటన, భిన్నమైన పాత్రల ఎంపిక ప్రేక్షకులను ఆకట్టుకుంటోంది. త్వరలో మరిన్ని విభిన్న పాత్రల్లో ఆమె కనిపించనున్నట్లు సమాచారం.