Published on Nov 13, 2024 6:03 PM IST
ప్రస్తుతం దర్శకధీరుడు ఎస్ఎస్.రాజమౌళి తన నెక్ట్స్ ప్రాజెక్ట్‌ని సూపర్ స్టార్ మహేష్ బాబుతో చేయనున్న సంగతి తెలిసిందే. ఈ సినిమా కోసం ఆయన ప్రస్తుతం ఆఫ్రికా దేశాల్లో లొకేషన్ల వేటలో ఉన్నాడు. అంతేగాక ఈ సినిమాను అడ్వెంచర్ మూవీగా తెరకెక్కించనున్న రాజమౌళి, దీన్ని పాన్ వరల్డ్ స్థాయిలో రూపొందించేందుకు సిద్ధమవుతున్నాడు.
అయితే, ఈ సినిమాలో మహేష్ బాబును ఇప్పటివరకు చూడని విధంగా ప్రెజెంట్ చేయనున్నాడు జక్కన్న. కాగా, ఇప్పుడు ఈ సినిమాలో మహేష్ పాత్రకి సంబంధించి ఓ ఇంట్రెస్టింగ్ వార్త నెట్టింట హల్‌చల్ చేస్తోంది. ఈ సినిమాకు రామాయణంతో కొంతమేర పోలిక ఉండనుందని.. ఈ సినిమాలో మహేష్ బాబుని రాముడి పాత్రలోనూ రాజమౌళి చూపెట్టేందుకు ప్లాన్ చేస్తున్నాడట. గతంలో ‘ఆర్ఆర్ఆర్’ మూవీలో అల్లూరి సీతారామరాజుగా కొంతసేపు రామ్ చరణ్‌ని చూపెట్టిన రాజమౌళి, ఆ పాత్రకు ఎలాంటి హైప్ తీసుకొచ్చాడో తెలిసిందే.
ఇప్పుడు రాముడిగా మహేష్ బాబును చూపెడితే ఇక థియేటర్లలో ఎలాంటి రచ్చ ఉండనుందో ఊహించుకోవచ్చు. రాముడిగా మహేష్‌ను చూపెట్టే నేపథ్యం వారణాసిలో ఉండనుందని.. ఇది సినిమాకు టర్నింగ్ పాయింట్ అవుతుందని సినీ సర్కిల్స్‌లో వార్తలు చక్కర్లు కొడుతున్నాయి. ఇక ఈ వార్తలతో, మహేష్ బాబుని రాముడిగా చూసేందుకు ఆయన అభిమానులు ఆసక్తిగా ఎదురుచూస్తున్నారు.