విక్కీ కౌశల్ ప్రధాన పాత్రలో నటించిన ‘ఛావా’ సినిమా బాక్సాఫీస్ వద్ద ఘన విజయం సాధించింది. విడుదలకు ముందు పెద్దగా అంచనాలు లేకపోయినా, సినిమా థియేటర్లలోకి రాగానే అసాధారణ స్పందన దక్కింది. అన్ని వర్గాల ప్రేక్షకులు ఈ సినిమాను విశేషంగా ఆదరిస్తుండటంతో కలెక్షన్లు అమాంతం పెరిగాయి. చారిత్రక నేపథ్యంతో తెరకెక్కిన ఈ చిత్రం 14 రోజుల్లో 400 కోట్ల క్లబ్‌లోకి చేరింది.
లక్ష్మణ్ ఉటేకర్ దర్శకత్వం వహించిన ఈ సినిమాలో రష్మిక మందన్న యేసుబాయి పాత్రలో, అక్షయ్ ఖన్నా ఔరంగజేబుగా అద్భుతమైన నటనను చేశారు. ఛత్రపతి శంభాజీ మహారాజ్ జీవిత కథ ఆధారంగా రూపొందిన ఈ సినిమా, భారతదేశంతో పాటు అంతర్జాతీయంగా కూడా భారీ కలెక్షన్లు రాబడుతోంది. ముఖ్యంగా శివరాత్రి సెలవుల ప్రభావంతో, ప్రేక్షకులు థియేటర్లకు పెద్ద సంఖ్యలో తరలివస్తున్నారు.
ఈ విజయంతో విక్కీ కౌశల్ కెరీర్‌లోనే అతిపెద్ద హిట్ ఇదిగా నిలిచింది. అలాగే, రష్మిక మందన్న ‘యానిమల్’, ‘పుష్ప 2’ విజయాల తరువాత ‘ఛావా’ కూడా బ్లాక్‌బస్టర్‌గా నిలిచినందున, పాన్-ఇండియా హిట్ హీరోయిన్‌గా ఆమె గుర్తింపు పొందుతోంది. సినిమా కలెక్షన్ల జోరు చూస్తుంటే 500 కోట్ల క్లబ్‌లోకి చేరడం ఖాయం అని ట్రేడ్ విశ్లేషకులు భావిస్తున్నారు.
ఈ విజయాన్ని ఛావా టీమ్ పండుగలా జరుపుకుంటోంది. సినిమా పై ఆదరణ ఇలానే కొనసాగితే, మరిన్ని రికార్డులు బద్దలవ్వడం ఖాయం. విక్కీ కౌశల్, రష్మిక మందన్న, అక్షయ్ ఖన్నా నటనకు, లక్ష్మణ్ ఉటేకర్ దర్శకత్వానికి ప్రేక్షకులు బ్రహ్మరథం పడుతున్నారు.