బాలీవుడ్ మల్టీటాలెంటెడ్ సెలబ్రిటీ ఫరా ఖాన్ తాజాగా తన వ్యక్తిగత జీవితం గురించి చేసిన వ్యాఖ్యలు నెట్టింట హల్‌చల్ చేస్తున్నాయి. కొరియోగ్రాఫర్, దర్శకురాలిగా పేరొందిన ఫరా, “మైన్ హూన్ నా” సినిమా సెట్స్‌లో షిరీష్ కుందర్‌ను కలుసుకొని, 2004లో ఆయనను వివాహం చేసుకున్నారు.
ఒక ఇంటర్వ్యూలో ఫరా ఖాన్ మాట్లాడుతూ – “తొలిసారి షిరీష్‌ను కలిసినప్పుడు ఆయన ‘గే’ అని అనుకున్నా. ఆ ఆలోచన ఆరు నెలల పాటు ఉండింది. అప్పుడు ఆయనపై నాకో రకమైన ద్వేషం కూడా ఉండేది,” అని చెప్పి అందరినీ ఆశ్చర్యపరిచారు. అంతేకాదు, షిరీష్ కోపంగా ఉన్నప్పుడు ఏమీ మాట్లాడకుండా మౌనంగా ఉంటాడని, అది తనకు ఎక్కువగా చిరాకు తెప్పిస్తుందని చెప్పారు.
తమ ఇద్దరి పెళ్లి జీవితం గురించి ఫరా ఆసక్తికరంగా వివరించారు. “ఈ 20 ఏళ్ల పెళ్లి జీవితంలో, షిరీష్ ఒక్కసారైనా ‘సారీ’ అన్నట్లు లేదు!” అంటూ హాస్యంగా వ్యాఖ్యానించారు. 2008లో వీరు IVF ద్వారా ముగ్గురు పిల్లలకు తల్లిదండ్రులు అయ్యారు – కుమారుడు సిజార్, కుమార్తెలు అన్యా, దివా.
ఫరా కామెంట్లు విని నెటిజన్లు ఆశ్చర్యపోతున్నారు. చాలామంది ఆమె నిజాయితీని ప్రశంసిస్తున్నారు, మరికొందరు మాత్రం ఇలా వ్యక్తిగత విషయాలు బహిర్గతం చేయడాన్ని తప్పుపడుతున్నారు.