కాజల్ అగర్వాల్ దక్షిణాది చిత్ర పరిశ్రమలో తనకంటూ ప్రత్యేక గుర్తింపు తెచ్చుకున్న ప్రముఖ నటి. చిన్నకాలంలోనే స్టార్ హీరోయిన్‌గా ఎదిగిన ఆమె, టాలీవుడ్, కోలీవుడ్‌లో టాప్ హీరోలందరితోనూ జతకట్టి మెప్పించారు. వివాహం తర్వాత కూడా సినిమాల్లో నటిస్తూ ప్రేక్షకులను అలరిస్తున్నారు. కెరీర్ మొదటి నుంచే గ్లామర్, గ్రేస్, అభినయంతో ఆమె ప్రత్యేక స్థానాన్ని సంపాదించుకున్నారు.
1985 జూన్ 19న ముంబైలో పంజాబీ కుటుంబంలో జన్మించిన కాజల్, సెయింట్ ఆన్స్ హైస్కూల్‌లో ప్రాథమిక విద్యను పూర్తి చేసి, జై హింద్ కళాశాలలో ఇంటర్, మాస్ మీడియా డిగ్రీ పూర్తి చేశారు. 2004లో “క్యూన్! హో గయా నా” చిత్రంతో బాలీవుడ్‌లో అడుగుపెట్టి, 2007లో “లక్ష్మీ కళ్యాణం” సినిమాతో టాలీవుడ్‌లోకి ఎంట్రీ ఇచ్చారు. ఆ తర్వాత “మగధీర”, “డార్లింగ్”, “బిజినెస్ మాన్”, “తుపాకీ”, “మేర్సల్”, “ఖైదీ నంబర్ 150” వంటి బ్లాక్‌బస్టర్ చిత్రాలతో స్టార్ హీరోయిన్‌గా గుర్తింపు తెచ్చుకున్నారు.
ఆంగ్ల మీడియా కథనాల ప్రకారం, కాజల్ అగర్వాల్ నికర సంపద దాదాపు రూ. 67 కోట్లు కాగా, కొన్ని వెబ్‌సైట్‌ల ప్రకారం 90 కోట్ల వరకు ఉండవచ్చని అంచనా. ప్రస్తుతం ఒక్కో సినిమాకు రూ. 2 నుంచి రూ. 4 కోట్లు పారితోషికంగా తీసుకుంటున్నట్లు తెలుస్తోంది. అంతేకాదు, ముంబైలో రూ. 6 కోట్ల విలువైన లగ్జరీ బంగ్లా ఆమెకు ఉంది.
కాజల్ అగర్వాల్ వద్ద ఆడి A4, రేంజ్ రోవర్, స్కోడా ఆక్టేవియా వంటి ఖరీదైన కార్లు ఉన్నాయి. అదనంగా, ఆమెకు బ్యూటీ ప్రొడక్ట్స్‌కు సంబంధించిన ఓ కంపెనీ కూడా ఉంది. నటనతో పాటు వ్యాపార రంగంలోనూ అడుగుపెట్టిన కాజల్, తన ప్రత్యేకతను కొనసాగిస్తూ అభిమానులను అలరిస్తున్నారు.