ఉత్తర ప్రదేశ్‌లోని ప్రయాగ్‌రాజ్ మహా కుంభమేళా ఫిబ్రవరి 26, 2025 న ముగియనుంది. జనవరి 13న ప్రారంభమైన ఈ భారీ ఆధ్యాత్మిక ఉత్సవానికి కోట్లాది మంది భక్తులు హాజరయ్యారు. సామాన్యులతో పాటు సెలబ్రిటీలు, రాజకీయ నాయకులు కూడా ఈ పుణ్యస్నానానికి తరలివచ్చారు. బాలీవుడ్ స్టార్ హీరోయిన్ కత్రినా కైఫ్ తన అత్త వీనా కౌశల్ (విక్కీ కౌశల్ తల్లి) తో కలిసి త్రివేణి సంగమం వద్ద పవిత్ర స్నానం ఆచరించింది.
స్నానం సందర్భంగా కత్రినాను చూసిన అభిమానులు భారీగా గుమిగూడారు. సెల్ఫీలు, ఫోటోలు తీసేందుకు ప్రయత్నించారు. ఈ దృశ్యాలను డ్రోన్ వీడియోలో బంధించడంతో, ప్రస్తుతం ఈ వీడియో సోషల్ మీడియాలో తెగ వైరల్ అవుతోంది. కొందరు నెటిజన్లు “ఆధ్యాత్మిక వేడుకల్లో సెలబ్రిటీలను ఇబ్బంది పెట్టడం మంచిది కాదు” అని అభిప్రాయపడుతున్నారు. అయితే, కత్రినా అభిమానులు మాత్రం “ఇందులో ఆమెకు ఎలాంటి తప్పు లేదు, కొంతమంది జనాలే అతిగా ప్రవర్తించారు” అని వివరిస్తున్నారు.
కత్రినా కైఫ్ కేవలం పుణ్యస్నానం మాత్రమే కాకుండా, మహా కుంభమేళాలో జరిగిన ఆధ్యాత్మిక కార్యక్రమాల్లో కూడా పాల్గొంది. గంగా హారతికి హాజరై, భక్తులకు స్వయంగా అన్నప్రసాదం వడ్డించింది. అంతేకాదు, పరమార్థ నికేతన్ ఆశ్రమ వ్యవస్థాపకుడు స్వామి చిదానంద సరస్వతి ఆశీస్సులు తీసుకుంది. ఈ వేడుకల్లో బాలీవుడ్ నటులు రవీనా టండన్, అభిషేక్ బెనర్జీ కూడా పాల్గొన్నారు.
ప్రస్తుతం, కత్రినా కుంభమేళా సందడి నెట్టింట హాట్ టాపిక్ అవుతోంది. ఆమె స్నానం, ప్రార్థన, ఆధ్యాత్మిక సేవా కార్యక్రమాల ఫోటోలు, వీడియోలు వైరల్ అవుతున్నాయి. కుంభమేళా వేడుకల్లో పాల్గొన్న సినీతారలు అందరి దృష్టిని ఆకర్షించగా, “సెలబ్రిటీల భక్తిభావం చూస్తే గర్వంగా అనిపిస్తోంది” అంటూ అభిమానులు హర్షం వ్యక్తం చేస్తున్నారు.