విడుదల తేదీ : అక్టోబర్ 25, 2024
123తెలుగు.కామ్ రేటింగ్ : 2.5/5
నటీనటులు : సాయి రోనక్, ప్రగ్యా నగ్రా, రాజేంద్ర ప్రసాద్, రోహిణి, ఎల్బీ శ్రీరామ్, రఘుబాబు తదితరులు
దర్శకుడు : రమేష్ చెప్పాల
నిర్మాత : సుభిషి వేణుగోపాల్ రెడ్డి
సంగీత దర్శకుడు : చరణ్ అర్జున్
నేపథ్య సంగీతం : మణిశర్మ
సినిమాటోగ్రఫీ : బాల్ రెడ్డి
ఎడిటర్ : బొంతల నాగేశ్వర్ రెడ్డి
సంబంధిత లింక్స్: ట్రైలర్
టాలీవుడ్‌లో తెరకెక్కిన ‘లగ్గం’ పూర్తి ఎమోషనల్ కంటెంట్‌తో ప్రేక్షకులను ఆకట్టుకుంటుందని మేకర్స్ చెబుతూ వచ్చారు. తెలంగాణ యాసలో తెరకెక్కిన ఈ సినిమా మంచి ఎమోషన్స్‌తో అలరిస్తుందని వారు ప్రమోషన్స్‌లో చెబుతూ వచ్చారు. మరి నేడు థియేటర్లలో రిలీజ్ అయిన ఈ సినిమా ప్రేక్షకులను ఎంతమేర ఆకట్టుకుందో ఈ రివ్యూలో చూద్దాం.
కథ:
హైదరాబాద్‌లో సాఫ్ట్‌వేర్ ఇంజినీర్‌గా పనిచేస్తున్న తన మేనల్లుడు చైతన్య(సాయి రోనక్)ని తన కూతురు మానస(ప్రగ్యా నగ్రా)కి ఇచ్చి పెళ్లిచేయాలని రాజేంద్ర ప్రసాద్ భావిస్తాడు. ఈ మేరకు తన చెల్లి(రోహిణి)తో మాట్లాడి సంబంధం కుదుర్చుతాడు. ఆమె కూడా తన మేనకోడల్ని తన కొడుకుకి ఇచ్చి పెళ్లి చేయాలని చూస్తుంది. ఈ క్రమంలో పెళ్లికి ఏర్పాట్లు కూడా ఘనంగా చేస్తారు. అనుకోని విధంగా వీరిద్దరి పెళ్లి ఆగిపోతుంది. ఇంతకీ వీరి పెళ్లి ఎందుకు ఆగిపోయింది..? వీరి పెళ్లి ఆగిపోవడానికి కారణం ఎవరు..? చైతన్యతో పెళ్లికి మానస నిజంగానే ఒప్పుకుందా..? చివరికి వీరిద్దరి పెళ్లి జరుగుతుందా లేదా..? అనేది సినిమా చూసి తెలుసుకోవాల్సిందే.
ప్లస్ పాయింట్స్:
‘లగ్గం’ సినిమాలోని నేటివ్ కథ ప్రేక్షకులను ఆకట్టుకుంటుంది. ప్యూర్ తెలంగాణ యాసలో, ఇక్కడి సంప్రదాయాలను మరోసారి ఆడియెన్స్‌కు పరిచయం చేస్తారు. చక్కటి ఎమోషన్స్‌తో సాగే కథ సినిమాపై ఆసక్తిని కలిగిస్తుంది. ఇందులోని నటీనటులు తెలంగాణకు చెందని వారు అయినా, వారు పలికే తెలంగాణ యాస ఆకట్టుకుంటుంది.
ముఖ్యంగా సాయి రోనక్ తన పాత్రలో చక్కగా నటించాడు. యాక్షన్, ఎమోషనల్ సీన్స్‌లో చక్కటి ప్రతిభ కనబరిచాడు. నటి రోహిణి కూడా తన నటనతో ప్రేక్షకులను ఇంప్రెస్ చేసింది. రఘుబాబు, సప్తగిరి, రచ్చ రవి లాంటి కమెడియన్స్ ఆకట్టుకున్నారు. ఇక ఈ సినిమాకు మరో మేజర్ అసెట్‌గా బీజీఎం నిలిచింది. సెకండాఫ్‌లోని ఓ మాస్ బీట్‌తో వచ్చే సాంగ్, క్లైమాక్స్‌లో వచ్చే ఎమోషనల్ సాంగ్ రెండూ ఆకట్టుకున్నాయి. సెకండాఫ్‌లోని ఓ ట్రాజెడీ సీన్‌తో పాటు క్లైమాక్స్‌లో నటీనటుల పర్ఫార్మెన్స్ ఆడియెన్స్‌ని ఆకట్టుకుంటాయి.
మైనస్ పాయింట్స్:
ఎమోషనల్ కంటెంట్ అయినప్పటికీ ఈ సినిమాలోని పేస్ చాలా స్లోగా సాగుతుంది. ముఖ్యంగా ఫస్ట్ హాఫ్‌లో చాలా వరకు ఫ్లాట్ సీన్స్ వస్తుండటం ప్రేక్షకులను ఆకట్టుకోవు. ఇంట్రెస్టింగ్ అంశాలు, ఆకట్టుకునే పాటలు లేకపోవడం ఫస్ట్ హాఫ్‌కు డ్యామేజ్ చేశాయి. నటీనటులకు కూడా పెద్దగా పర్ఫార్మెన్స్ ఇచ్చే స్కోప్ ఫస్ట్ హాఫ్‌లో కనిపించకపోవడం మైనస్.
కథ సెకండాఫ్‌లో కాస్త సీరియస్ మోడ్‌లోకి వెళ్లినా, అనవసరమైన కామెడీ పెట్టి సినిమాను సాగదీసినట్లుగా ప్రేక్షకులు ఫీల్ అవుతారు. సీనియర్ ఆర్టిస్టులు కూడా డైలాగులను బలవంతంగా పలికినట్లు అనిపించడం ప్రేక్షకులను ఆకట్టుకోదు. సెకండాఫ్‌లో పూర్తిగా ఎమోషన్‌కే పెద్దపీట వేయడంతో యాక్షన్ మిస్ అయ్యిందని చెప్పాలి.
సాంకేతిక విభాగం:
దర్శకుడు ఎంచుకున్న కథ బాగున్నా, దాని ఎగ్జిక్యూషన్‌లో ఇంకాస్త జాగ్రత్తలు తీసుకోవాల్సింది. ఫోకస్ మొత్తం ఎమోషన్‌పైనే పెట్టడంతో ఫస్ట్ హాఫ్‌లోని స్క్రీన్‌ప్లే స్లోగా సాగింది. కథ నెరేషన్ కూడా వీక్‌గా ఉందని చెప్పాలి. చరణ్ అర్జున్ సంగీతం కేవలం రెండు పాటల వరకే ఆకట్టుకున్నాయి. మణిశర్మ బీజీఎం ఎమోషనల్ సీన్స్‌ను పండించింది. బాల్ రెడ్డి సినిమాటోగ్రఫీ బాగుంది. పల్లెటూరి వాతావరణాన్ని చాలా కలర్‌ఫుల్‌గా చూపెట్టారు. ఎడిటింగ్ విషయంలో జాగ్రత్తలు తీసుకోవాల్సింది. కొన్ని సీన్స్‌ను తొలగించి ఉంటే బాగుండేది. నిర్మాణ విలువలు బాగున్నాయి.
తీర్పు:
‘లగ్గం’ అనే ఇంట్రెస్టింగ్ టైటిల్‌తో వచ్చిన ఈ సినిమాలో.. ఎంచుకున్న పాయింట్ బాగున్నా, దాన్ని ప్రెజెంట్ చేసిన విధానం కొంతమేర ఆకట్టుకోలేకపోయింది. స్క్రీన్ ప్లే స్లోగా సాగడం, ఆకట్టుకునే పాటలు లేకపోవడం సినిమాకి మైనస్‌గా నిలిచాయి. ఓవరాల్‌గా ఎమోషనల్ కంటెంట్‌ను ఇష్టపడే వారికి ‘లగ్గం’ మూవీ కొంతమేర నచ్చుతుంది.
123telugu.com Rating: 2.5/5
Reviewed by 123telugu Team
Click Here For English Review