రంగుల ప్రపంచం అయిన సినిమా ఇండస్ట్రీలో, రాణించడం అంత సులువు కాదు. కొన్ని విజయాలు, చాలా పోటీ, నిరీక్షణ, మరియు నిరాకరణల మధ్య కొంతమంది నటీనటులు ఎదుగుతారు. అలాంటి ప్రయాణాన్ని అనుభవించింది టాలీవుడ్ క్యూటీ రీతూ వర్మ (Ritu Varma). ఈమె తన కెరీర్‌ను చైల్డ్ ఆర్టిస్ట్ గా ఎన్టీఆర్ హీరోగా నటించిన ‘బాద్‌షా’ సినిమాలో మొదలుపెట్టింది. ఆ సినిమాలో కాజల్ అగర్వాల్ చెల్లిగా కనిపించింది. ఆ తరువాత, ‘ప్రేమ ఇష్క్ కాదల్’ వంటి చిన్న సినిమాతో హీరోయిన్‌గా మారింది.
రీతూ వర్మ అసలైన గుర్తింపు పొందింది ‘ఎవడే సుబ్రహ్మణ్యం’, ‘పెళ్లిచూపులు’ వంటి హిట్ చిత్రాల ద్వారా. ఈ సినిమాలు ఆమెను టాలీవుడ్‌లో క్రేజీ బ్యూటీగా నిలబెట్టాయి. అయితే కెరీర్ పరంగా ఆమె చేసిన 12 సినిమాల్లో కేవలం 4 సినిమాలే హిట్స్ కావడం కొంత నిరాశ కలిగించే విషయం. అయినప్పటికీ అవకాశాలు మాత్రం తగ్గలేదు. ఆమె తమిళ్ సినిమాలలో కూడా తన అదృష్టాన్ని పరీక్షించుకుంది, కానీ అంతగా నిలవలేదు.
ప్రస్తుతం రీతూ ‘దేవిక & డానీ’ అనే వెబ్ సిరీస్ తో ప్రేక్షకులను పలకరించేందుకు సిద్ధమవుతోంది. ఇటీవల జరిగిన ఈ సిరీస్ ప్రమోషన్ ఈవెంట్‌లో, రీతూ వర్మ భావోద్వేగానికి లోనయ్యింది. “మన చుట్టూ ఉన్న వారే మనల్ని నమ్మరు, మనపై ప్రశ్నలు వేస్తారు, ఇదీ మహిళలు ఎదుర్కొనే నిజమైన సవాల్లలో ఒకటి” అంటూ ఆమె భావోద్వేగంగా మాట్లాడింది.
ఈ వెబ్ సిరీస్ మహిళలకు ధైర్యాన్ని, బలాన్ని ఇస్తుందని ఆమె నమ్మకాన్ని వ్యక్తపరిచింది. రీతూ వర్మకు ఈ సిరీస్ టర్నింగ్ పాయింట్ అవుతుందో చూడాలి!