OTT Trending Film: థియేటర్లలో భారీ విజయాన్ని అందుకున్న సినిమా ఓటీటీలోకి వచ్చిన తర్వాత కూడా అదే జోరును కొనసాగిస్తోంది. అదే సమంత రూత్ ప్రభు ప్రధాన పాత్రలో నటించిన ‘మా ఇంటి బంగారం’. బాక్సాఫీస్ వద్ద 100 కోట్లతో సంచలన విజయాన్ని నమోదు చేసిన ఈ మూవీ, ఇప్పుడు ఓటీటీ ప్రేక్షకులను కూడా విపరీతంగా ఆకట్టుకుంటోంది. తెలుగు చిత్ర పరిశ్రమలో లేడీ ఓరియెంటెడ్ కథాంశంతో తెరకెక్కిన సినిమాల్లో అత్యధిక వసూళ్లు సాధించిన సినిమాల్లో ఒకటిగా ఈ మూవీ నిలిచింది కూడా. ‘మా ఇంటి బంగారం’ ఇప్పుడు ఓటీటీలో అత్యధిక వ్యూస్ జాబితాలో టాప్లో కొనసాగుతోంది. థియేటర్లలో మిస్ అయిన ప్రేక్షకులు ఇప్పుడు ఓటీటీలో ఈ సినిమాను ఆస్వాదిస్తున్నారు.
జియో హాట్స్టార్లో
జూన్ 19న థియేటర్లలో అడుగుపెట్టిన ఈ సినిమా సంచలన విజయం నమోదుచేసింది. ఆతరువాత జులై 17 నుంచి జియో హాట్స్టార్ ఓటీటీలోకి ఎంట్రీ ఇచ్చింది. జియో హాట్స్టార్లో స్ట్రీమింగ్ ప్రారంభమైన కొద్ది సమయంలోనే ట్రెండింగ్లో అగ్రస్థానానికి చేరుకుని మరోసారి తన సత్తా చాటింది ఈ మూవీ. సుమారు రెండు గంటల 32 నిమిషాల నిడివి గల ఈ యాక్షన్ కామెడీ ఎంటర్టైనర్లో సమంత ఒక్కరే కథను తన భుజాలపై మోశారని ప్రేక్షకులు ప్రశంసిస్తున్నారు. కామెడీ, సెంటిమెంట్, యాక్షన్ ఎలిమెంట్స్ తో ఈ చిత్రం థియేటర్లలో మంచి స్పందన దక్కించుకోగా, ఇప్పుడు డిజిటల్ వేదికలోనూ అదే ఊపును కొనసాగిస్తోంది.
సినిమా కథ
ఈ కథ స్వర్ణ అనే అనాథ యువతి చుట్టూ తిరుగుతుంది. బయటకు ఎంతో అమాయకంగా కనిపించే ఆమె జీవితంలో మాత్రం ఎన్నో విషాదాలు దాగి ఉంటాయి. పెళ్లి తర్వాత డాక్టర్ అయిన తన భర్త కుటుంబంలో కలిసిపోవాలని ఎంత ప్రయత్నించినా పరిస్థితులు ఆమెకు అనుకూలంగా మారవు. ఇదే సమయంలో గతంలో తనకు శత్రువులుగా ఉన్న వ్యక్తులు మళ్లీ ఆమె జీవితంలోకి అడుగుపెడతారు. దీంతో తనను మాత్రమే కాదు, తన భర్త కుటుంబాన్ని కూడా కాపాడుకోవాల్సిన పరిస్థితి ఏర్పడుతుంది. ఆ తర్వాత స్వర్ణ పూర్తిగా మారిపోతుంది. పరిస్థితులు ఆమె చేతిలో ఆయుధం పట్టేలా చేస్తాయి. తనను వెంబడించే శత్రువులను ధైర్యంగా ఎదుర్కొంటూ ప్రతీకారం తీర్చుకునే మహిళగా ఆమె ప్రయాణం సాగుతుంది. ఆమె అసలు స్వరూపాన్ని చూసి కుటుంబ సభ్యులు కూడా ఆశ్చర్యపోతారు. ఈ పాత్రలో సమంత చూపించిన యాక్షన్, ఎమోషనల్ పెర్ఫార్మెన్స్ కు ప్రేక్షకులు కూడా ఫిదా అవుతున్నారు.
అయితే ప్రస్తుతం ఈ చిత్రం తెలుగు సహా కొన్ని భాషల్లో మాత్రమే అందుబాటులో ఉంది. హిందీ వెర్షన్ మాత్రం ఇంకా ఓటీటీ ప్లాట్ఫామ్లో విడుదల కాలేదు. అయినప్పటికీ సమంత అభిమానులతో పాటు యాక్షన్ చిత్రాలను ఇష్టపడే ప్రేక్షకులు ఈ సినిమాకు మంచి ఆదరణ చూపిస్తున్నారు. థియేటర్ల తర్వాత డిజిటల్ వేదికలోనూ ఇదే స్థాయి స్పందన రావడంతో, ‘మా ఇంటి బంగారం’ మరోసారి విజేతగా నిలిచిందని సినీ విశ్లేషకులు అభిప్రాయపడుతున్నారు.