Khalifa: మలయాళ స్టార్ హీరో పృథ్వీరాజ్ సుకుమారన్ నటిస్తున్న భారీ యాక్షన్ ఎంటర్టైనర్ ‘ఖలీఫా: పార్ట్ 1’ మరో కీలక అప్డేట్తో వచ్చింది. ఈ మూవీలో ప్రత్యేక అతిథి పాత్రలో కనిపించనున్న సూపర్ స్టార్ మోహన్లాల్ తన డబ్బింగ్ను పూర్తి చేశారు. ఈ విషయాన్ని చిత్ర బృందం ఆఫీషియల్ గా ప్రకటించడంతో అభిమానుల్లో సినిమాపై మరింత ఆసక్తి పెరిగింది. పృథ్వీరాజ్ అధికారిక నెట్వర్క్ పోఫాక్టియో సోషల్ మీడియాలో డబ్బింగ్ స్టూడియోలోని మోహన్లాల్ ఫొటోలను పంచుకుంది. ఆ పోస్టులో మాంబరక్కల్ అహమ్మదాలీ పాత్రకు మోహన్లాల్ డబ్బింగ్ పూర్తి చేసినట్లు వెల్లడించింది. పార్ట్ 1లో ఆయన పాత్ర పరిమితంగానే కనిపించినా, పార్ట్ 2లో మరింత కీలకంగా ఉండబోతుందని చిత్ర బృందం సంకేతాలు ఇచ్చింది. దీంతో సీక్వెల్పై కూడా ఇప్పటి నుంచే భారీ అంచనాలు ఏర్పడుతున్నాయి.
వైశాఖ్ దర్శకత్వంలో తెరకెక్కుతున్న ‘ఖలీఫా: పార్ట్ 1’ కథ బంగారం స్మగ్లింగ్ కేంద్రంగా సాగుతుంది. గల్ఫ్, లండన్, నేపాల్, కేరళ ప్రాంతాలకు విస్తరించిన వ్యాపార నెట్వర్క్ను నడిపే ఆమిర్ అలీ (పృథ్వీరాజ్) అనే వ్యక్తి చుట్టూ కథ తిరుగుతుంది. తన తాత మాంబరక్కల్ అహమ్మదాలీ నిర్మించిన వ్యాపార సామ్రాజ్యాన్ని వారసత్వంగా అందుకున్న ఆమిర్, దానిని నిలబెట్టుకుంటాడా లేదా అన్నదే కథలో ప్రధాన అంశం. ఈ సినిమాలో పృథ్వీరాజ్తో పాటు నీల్ నితిన్ ముఖేష్, మాల్వికా శర్మ కీలక పాత్రల్లో నటిస్తున్నారు. ఇందులో మోహన్లాల్ ఆమిర్ తాత పాత్రలో కనిపించనున్నారు. స్క్రీన్ప్లేను జిను వి. అబ్రహం అందించగా, ఆయన సహ నిర్మాతగానూ వ్యవహరించారు. సంగీతాన్ని జేక్స్ బెజోయ్ అందించగా, సినిమాటోగ్రఫీ బాధ్యతలను జోమోన్ టి. జాన్ నిర్వహించారు. ‘ఖలీఫా: పార్ట్ 1’ 2026 ఆగస్టు 20న ప్రపంచవ్యాప్తంగా థియేటర్లలో విడుదల కానుంది. విడుదలకు ముందే వచ్చిన ఈ డబ్బింగ్ అప్డేట్ సినిమాపై ఉన్న అంచనాలను మరింత పెంచింది.
ఇక మోహన్లాల్ కెరీర్ విషయానికి వస్తే, ప్రస్తుతం ఆయన తరుణ్ మూర్తి దర్శకత్వంలో తెరకెక్కుతున్న ‘అతిమనోహరం’ చిత్రంలో పోలీస్ అధికారిగా నటిస్తున్నారు. ఈ మూవీ 2026 డిసెంబర్ 24న విడుదల కానుంది. అలాగే ప్రియదర్శన్ దర్శకత్వంలో రూపొందనున్న 100వ చిత్రం, ‘ఎల్367’, దిలీష్ పోతన్ తెరకెక్కిస్తున్న ‘నెడుకండం మిరాకిల్’ చిత్రాలు కూడా ఆయన చేతిలో ఉన్నాయి. అంతేకాకుండా రజనీకాంత్ నటిస్తున్న ‘జైలర్ 2’లో అతిథి పాత్రలో కనిపించనున్నారని ప్రచారం జరుగుతుండగా, తన కుమార్తె విస్మయ మోహన్లాల్ తొలి సినిమా ‘తుడక్కం’లో కూడా ఆయన ప్రత్యేక పాత్ర పోషించనున్నారు.