భారతీయ చలనచిత్ర చరిత్రలో ‘దృశ్యం’ మూవీ ఒక సంచలనం. మలయాళంలో మోహన్లాల్ పోషించిన జార్జ్ కుట్టి పాత్రను తెలుగులో విక్టరీ వెంకటేష్ అద్భుతంగా పండించారు. అయితే ఈ సినిమా రీమేక్ చేస్తున్న సమయంలో వెంకటేష్ చేసిన కొన్ని వ్యాఖ్యలను తాజాగా నటి ఎస్తేర్ అనిల్ (Esther Anil) గుర్తు చేసుకున్నారు. ఒక నటుడిగా వెంకటేష్ ఎంతటి సంస్కారం కలిగిన వారో మరోసారి నిరూపించింది.
రీమేక్ షూటింగ్ సమయంలో వెంకటేష్ చాలా ఓపెన్గా ఒక విషయాన్ని అంగీకరించారట.. ‘మలయాళ వెర్షన్లో మోహన్లాల్ గారు ఇచ్చిన కొన్ని ఎక్స్ప్రెషన్స్ను నేను తిరిగి చేయలేను (Recreate). అది కేవలం ఆయనకు మాత్రమే సాధ్యం’ అని వెంకటేష్ అన్నారట. ఒక స్టార్ హీరో అయి ఉండి, మరో నటుడి ప్రతిభను అంతటి గొప్పగా గౌరవించడం టాలీవుడ్లో చర్చనీయాంశంగా మారింది. మలయాళం, తెలుగు, హిందీ వెర్షన్లలో కూతురు పాత్రలో నటించిన ఎస్తేర్ అనిల్.. వెంకటేష్తో పనిచేసిన అనుభవాన్ని పంచుకుంటూ ఈ విషయాన్ని వెల్లడించారు. మోహన్లాల్ నటన గురించి వెంకటేష్ గమనించి, ఆ స్థాయిని అందుకోవడం ఎవరికీ సాధ్యం కాదని మెచ్చుకోవడం ఆయన గొప్పతనమని ఆమె కొనియాడారు. ఇక వెంకటేష్ కెరీర్లో ఎన్నో సూపర్ హిట్ రీమేక్ సినిమాలు ఉన్నాయి. ‘దృశ్యం’ విషయంలో కూడా ఆయన తనదైన శైలిలో మార్పులు చేస్తూనే, ఆ పాత్రలోని ఎమోషన్ను తెలుగు ప్రేక్షకులకు కనెక్ట్ చేశారు. అందుకే తెలుగులో కూడా ‘దృశ్యం’, ‘దృశ్యం 2’ భారీ విజయాలను అందుకున్నాయి.